Lifere ond Lafere

Etz wääd glifered!

I bi d’Rosie. I studie im zweite Semeschte Multimedia Production a de Fachhochschuel Graubönde. Villicht hesch mi au scho im Radio ghööt ode uf eme Bühni gseh, seb machi ebe au no.

I bi z’Appezöll ufgwachse, bi denn abe vo zeh Joh uf St. Galle zöglet. Do gfallts me choge guet, au will s’Appezölleland so schö nööch isch. Abe noch söfel Joh i de Stadt hani gmeckt, dass min Appezölle Dialekt je lenge s’je meh vewäschne wääd.
Ond do bini nüd die enzig! Vo Generation zo Generation schwecht sich ösen Innerhode Dialekt all e chli meh ab. E isch bi de junge Lüüt nomme so bräät wie no bi ösne Grossöltere ond au en huffe Wöötli gönd all meh veloore. Do will i nebis degege tue!

Drom tueni eu do all paa Taag e orginölls Appezölle Wöötli lifere. Mit gschiidem Höndegrondwesse, loschtige Gschichte ode schöne Versli.

Instagram

Etz wääd glaferet!

Wie gsäät, min Dialekt het sich veenderet. Doch wa sönd eigentlich d’Grönd, werom sich Sproch – pesönlich ond au generöll – veenderet? Ond isch ösen Innerhode Dialekt schogää vom Uusteebe bedroht?

Da het mi unheimlich wonde gnoo ond i bi drom mit em Joe Manser zemeghocke. E eforscht ond dokumentiert de Appezölle Dialekt, onde anderem hette e s’bekannt Wöötebuech fö de Innerhode Dialekt usigee.
Troffe hani mi au mit de Celine Signer, sie studiet mit me zeme ond mit ehre hani öbe d'Zuekunft vo ösem Dialekt gschwätzt ond wa me junge Lüüt chönd tue, dass ebe ösi schö Sproch nüd veloore goht.

Nolose chasch da alls do im Podcast:

Ond sös?

Natüülig wääd do wiite glifered ond glaferet!
Da ganz Projekt machi im Rahme vo mim Studium ond drom programmieri i imme mol wiede a dere Websiite ommenand, so söll sie denn Schrett fö Schrett chli inteaktive wäre. Es wääd wiiteri Podcastfolge geh ond au sös hani no en huffe Idee fö eu parat. Meh willi abe no nüd veroote - eh wessid jo, me Appezölle:rinne hends chli mit de Gheimnis.

Mail